Teknokra.id -
Tata Ni Adat Sai Batin
(Mamak Lawok)
Bismillah sai pertama
Alhamdulillah puji
Nabik pun ngalimpukha
Dipusekam sunyin ni
Gusti sai batin marga
Laju pakha priyayi
Lebu daleh kalama
Minak muwakhi kanubi
Khusus sai hadir dija
Umum ni kham sunyin ni
Makejung pang babinta
Uleh sedih ni hati
Kik mak bakhong ngajaga
Jadi salai ni hani
Khungkak pak kayu khimba
Mati mak nunas lagi
Atokhan di dunia
Adat istiadat gelakh ni
Dampingan ni agama
Kik mak gegoh iwa ni
Di kham Lappung ji khua
Khua jukhai sang bumi
Sai batin penyimbang makhga
Jak tumbai di nekham ji
Pepadun tiyan liba
Manggala kota bumi
Tanno payu kham baca
Tata cakha sai kasi
Kik ya penyimbang makhga
Sai batin sai ka bunyi
Silsilah ni sai nyata
Seno sai jadi bukti
Walau ya nomokh lima
Sesuwai kukhunan ni
Adat sai batin makhga. Yaddo anak bakasni
Seno anak sai tuha
Sunyin jak puwakhi ni
Wajib do ya nakhima
Gelakh sai maha tinggi
Mawat menok di khaga
Kik ningrat tukhunan ni
Tamanggung daleh khaja
Seno sai dibawah ni
Khua belas sai mak suha
Seno diya sai mesti
Pu jenong suku makhga
Putisa ganggaman ni
Seno bumacam khupa
Sesuai kedudukan ni
Batin khadin minak sa
Sampai bu adok khayi
Kanjak awal bicakha
Tantu tukhun lukhus ni
Seno suku di khaja
Atokhan tumbai sakeji
Silsilah ni ti baca
Dipa ti pik jukhai ni
Pakhna hulun nyakhita
Kintu mak salah dengi
Tekhok ni ngedok tahta
Mulai ni nyeli seli
Kindanh lain di dija
Kintu wat hulun dudi
Kuk jukhai tang kakikha
Tekhok nyetik lom dikhi
Nukokh balik kon fakta
Ngakhubah tambo asli
Mani in kena diya
Pemapah ni pun gusti
Adok ni cinta khaja
Bebai ni batin seli
Malamon suku makhga
Sai ngkha waktu sinji
Adok ni kindo khaja
Hejong ni mak ngakheti
Suku adat sai khepa
Kik mak ngabantang gawi
Suku sai batin dipa
Sepa muneh tugas ni
Sungkan haga butanya
Mak ngunjak panghalu ni
Jatuh ni khaja uba
Matuha mak ngakheti
Bukharap di kham pakheda
Payu nyepok solusi
Adab adat sampukhna
Muloh gegoh sakeji
Ti hadap kepala makhga Di penyimbang sunyin ni
Dang jalma kabokh kuca
Tegak sepa mabani
Baca silsilah tuha
Kumpulkon minak muwakhi
Dang takhu sehahema
Contoh pai way malihi
Tambah lapok an basa
Hakhapan ku di keti
Tata adat bumakhga
Bakhong melestari kon ni
Adab sopan sa khepa
Akhlak budi pakerti
Dang jadi sama khata
Jama khumpok sunyin ni
Mani kham ngedok bahasa
Bahasa adat gelakh ni
Tanno ji sambukhana
Mak ngedok basa nyuwi
Ya disimbang sai ngukha
Goh lamban mak bukunci
Sunyin ni nukhut khiya
Mani tiyan mabani
Akhir ni tabokh kuca
Melamon ngehahikhi
Khaja adok ni khiya Kahajongan nyipi sipi
Mawat kiya sampukhena
Nyasakh di minak muwakhi
Basa ni jalma tuha
Makhisok nekham nengi
Gegoh ngagikhing kuda
Kheno pai umpama ni
Mahap bukhibu basa
Manat cutik di keti
Busekam sai butahta
Hakhus do hati-hati
Khadu malamon kaca
Uleh ni kukhang ngakheti
Bu pangluluh mak haga
Hina di pangkhasa ni
Jalema ni tabokh kuca
Ikin di kanan kikhi
Kuk sai bapak sai ina
Khisok bingsal uleh ni
Adat nekham bu makhga
Gegoh ikok ni tali
Contoh ni anak tangga
Wat mena wat dukhi
Kuk pandengon butahta
Sesuwai di penghuni
Katutuk tutokh basa Adab sopan busuwi
Sakhapa penyakhapa
Sedemikian lagi
Kajujung sanak ngukha
Hakhus do ma pastiti
Nekham khumpok sai tuha
Tawai do basa basi
Tawau do ya bu basa
Sesuwai tingkatan ni
Ama sumbahan sa khepa
Sepa tingkatan gusti
Sekinduwa jama sapa
Kik budak di adikni
Kindang ni gusti khaja
Unyin mawat makaini
Mak ngedok adab basa
Seno diya halokni
Mani kanjak hamama
Mak ngedok arahanni
Bahasa Indonesia
Lain bahasa bumi
Kapan adat budaya
Nekham gali asli ni
Kik Kham pakha punggawa
Mak ngekhiwoh ni lagi
Sepuluh tahun di muka
Biyadab sai tekhjadi
Hinggo ya kheji juga
Kik Kham mawat nyadakhi
Jak jaman purbakala
Sai asli wat di kham ji
Bahasa tutur sapa
Bahasa adab asli
Tulis Lappung ka ga bga
Kain tampan sai asli
Nekham hakhus bubangga
Payu ija kham gali
Mak khipa kham butanya. Lagi wat hulun ngakheti
Ka ngeba kham binasa
Mani kham mak pakhduli
Jama tara krama
Apilagi di kham ji
Jak dua ribu lima
Tukhis jak luwakh negeri
Ngehancokh kon budaya
Kham mawat hati-hati
Nyalana buntak khiya
Pakaian wala wikhi
Kheno muneh wanita
Bekakha nyitak dikhi
Lejing pas gegoh paha
Tikadedeh yu ken si
Diliyak sanak sakula
Mulang ya di usung ni
Ngalunik kon celana
Ti kacah injuk seksi
Sai tuha mak penyekhapa
Malahan mansa puji
Mudah do kada cawa
Kindang ti sani nyanyi
Sai nyadang kon agama
Adat khik tanoh bumi
Pekhtama ulih hakheta
Nyansat lipang muwakhi
Cadang muneh negara
Gara-gara korupsi
Kedua karena tahta
Mecoh minak muwakhi
Segaga di sai tuha
Tukhunan mak pakhduli
Silsilah mak ti baca
Sapa sai semesti ni
Tabokh jalema sang makhga
Kik mak bakhong pastiti
Sai ketiga wanita
Jadi hancokh sunyin ni
Ngehancokh kon khumah tangga
Bela hakhga ni dikhi
Adat adab agama
Unyin jadi di kikhi
Kham pakheda nyaksi kon ya
Kak nekham nuntun tivi
Mahap kon sekinduwa
Ajo sang pangkut lagi
Adat sau batin makhga
Mak ngedok juwal beli
Khepa tukhun lukhus sa
Jukhai kanjak sekeji
Hinggo tangguh sagaga
Gelakh ni tang sa sani
Aspal seno sai nyata
Lain zuriyat asli ni
Ku tutup antak ija
Mahap di minak muwakhi
Kintu wat sai bu guna
Iklas khila makai ni (Penulis: Amalia Sabilla Mukhtar).